聽說連大人都追看 《天竺鼠車車》爆紅的3大原因

呢幾日社交媒體全面被《天竺鼠車車》洗版,你睇咗未呢?唔少網友表示:「小朋友先睇《鬼滅之刃》,成熟嘅大人都只會睇《天竺鼠車車》!」甚至乎每集都要睇10次8次先夠,但呢套完全無對白,每集長度只有3分鐘嘅動畫,點解能夠令好多大朋友引起共鳴,究竟全個故事有咩咁吸引呢? 《天竺鼠車車》由一月開播,至今播出3集,風格以可愛見稱,由日本導演見里朝希製作,呢位畢業自東京藝術大學29歲導演作品唔多,但每一部都好有深度,會令人細心思考當中含意,以輕鬆手法帶出原本深處意思。 《天竺鼠車車》一季12集,一集長約3分鐘,喺現今繁忙社會都可以偷出時間一下子就能看完,有時影片太長會令人覺得太花時間,導致無耐性看完,導演完全掌握到現今都市人講求快捷心態,所以大受歡迎。 喺《天竺鼠車車》嘅世界,天竺鼠車車化身成所有車輛,再扮演唔同角色,所以會出現天竺鼠警車、天竺鼠的士等等,全部天竺鼠車由羊毛氈公仔製成,再加入真人、玩具公仔以及唔同場景,拍出各種日常小故事,例如第一集講馬路大塞車,救護車鼠鼠要趕住送病人到醫院,所以諗出一個辦法,就係喺車龍上駛過,相信你平日塞車都有諗過呢個方法?將大家平日所想嘅事實現,同時亦係天竺鼠車車受歡迎嘅原因。 雖然天竺鼠車車所有角色都係車輛,但其實感情豐富,遇到搶匪會害怕、塞車會著急,唔同反應配合各種表情,太可愛喇!除此之外,所有天竺鼠車車都係由「真鼠」發聲,導演找來多隻唔同嘅天竺鼠配音,發出搞笑「吱、吱」聲,令到唔少有飼養天竺鼠或倉鼠嘅網友表示聽到聲音好有親切感,而且全部角色造型都係圓碌碌好似個波一樣,一班天竺鼠車車跑來跑去非常好笑。或許2020年大家被疫情困擾生活太大壓力,能夠欣賞一套令你忘記日常煩惱嘅搞笑動畫,有一種被治癒嘅感覺。 香港YouTube頻道「Muse木棉花-HK」會播出《天竺鼠車車》官方正版,大家鍾意就可以去呢個頻道收睇啦! [...]