寒流襲港，跨年、元旦香港急凍只剩7度，天文台發放寒冷天氣預報，大家除了準備抗寒衣物外，必備保暖小物當然仲有暖包，不過日本醫學博士福田千晶喺著作《暖活：手腳冰冷隱藏著可怕的危機！》一書中指出，9成人喜歡將暖包放入衣袋用手搓，原來係放錯位置，佢指出人體有多處穴位可溫暖全身，只要將暖貼放啱位，就會全身暖笠笠足夠抵抗寒流。
腰間兩側
福田千晶認為暖貼最佳擺放位置係腰間兩側，佢解釋因為腰間骨頭少，周圍聚集咗肝臟、腎臟等血液流量多嘅內臟器官，當腰部溫暖時，大腦嘅緊張感亦得以紓緩，有助促進全身血液循環，令手腳都會溫暖，所以如果只有一個暖包，貼喺腰間兩側就係首選位置。
腹部
肚臍下方腹部位置，全讓整體內臟溫暖，內臟因為活動效率好，增加血液循環令到全身保暖。
背部
貼喺肩胛骨之間，有助於紓緩頭痛、肩膀痠痛等症狀，如果有多一個暖貼，不妨貼喺呢個位置。
後頸
放喺頸後根部，可有效消除肩頸痠痛與頭痛，同時可以用頸巾包圍住，而唔會影響外觀問題。
不過要注意，暖貼盡量避免長時間接觸皮膚，否則有可能會發生低溫燙傷情況，所以最好嘅位置就係腰間兩側，貼喺內衣面頭，用衣物隔開皮膚同暖貼，咁就既溫暖又安全。